Ginpadala sang pamilya Duterte ang anum ka mga Pilipino nga abogado agud nga magtambong sa confirmation of charges hearing batok kay former President Rodrigo Duterte sa International Criminal Court (ICC).
Sa statement sang Duterte Family, ginpahayag nga maga-upod sa proceedings ang Filipino legal team agud masiguro nga ma-representar sang husto ang former president.
Ini amo sanday:
- Salvador Medialdea, former executive secretary
- Salvador Panelo, former presidential chief legal counsel
- Silvestre Bello III, former labor secretary
- Martin Delgra, former Land Transportation Franchising and Regulatory Board chief
- Cesar Dulay, former Bureau of Internal Revenue commissioner
- Alfredo Lim, former president sang Philippine Amusement and Gaming Corp.
Sa press statement sang pamilya, wala ginkumpirma kun magatambong man sila sa hearing ukon kun sin-o sa ila ang magakadto sa The Hague, Netherlands, apang ila ginklaro nga wala nagpasugot ang ICC nga mabisita nila si Duterte samtang padayon ang hearings. Ang gintugtan lamang sang korte amo ang pagtawag pamaagi sa telepono.
Ginpasalamatan man sang pamilya Duterte ang Filipino lawyers sa ila suporta kag ang Filipino community sa The Hague.
Sandig kay Panelo, ginalauman nga magapungko sila sa public gallery kag magalantaw sa proceedings nga maga-umpisa 5:00 karon sa hapon oras sa Pilipinas.
May hearings man sa buwas, Martes, sa Huwebes, kag sa Byernes.
Nahibaluan nga sa idalom sang Rome Statute, ang ICC-accredited lawyers lamang ang opisyal nga maka-representar sa isa ka suspek ukon mangin sa mga biktima sa proceedings sang korte sa The Hague.
Ang head legal counsel ni Duterte amo ang British-Israeli lawyer nga si Nicholas Kaufman kag paga-updan sang veteran trial lawyer nga si Dov Jacobs nga amo ang associate counsel.
