NUEVA VALENCIA, GUIMARAS – Isa ka pamilya sa Sitio Dungkaan Barangay Lucmayan Nueva Valencia, Guimaras ang nangin biktima sang dengue hemorrhagic fever.
Sa interview sang Bombo Radyo kay Fely Tucato, anom sa myembro sang iya pamilya lakip na ang tatlo niya ka mga hinablos, duha ka mga apo kag isa niya ka umagad ang mga biktima sang nasambit nga balatian.
Suno kay Tucato, nagapabilin sa gihapon ang tatlo ka myembro sang pamilya sa ospital.
Dugang pa sang natungdan, mahimo nga indi sa ila balay nakuha ang dengue virus bangud adlaw-aldaw man sila nagapaninlo.
Samtang padayon naman ang kampanya kontra dengue sang Guimaras Provincial Government pinaagi sa mga lihok agud ng matapna ang pagduging sang lamok.
Suno kay Zenard Dela Cruz, Health Education and Promotion Officer, iya ginpahayag nga padayon ang paglibot sang mga ambulansya nga may mga poster nga nakapaskil bilang pahanumdom sa publiko nga manglimpyo sang tagsa ka ugsaran agud dengue ang malikawan.
Sa subong, masobra 1,000 na ang kaso sang dengue sa Guimaras sa diin nagapanguna nga may pinakamataas nga kaso amo ang Buenavista, ginasundan sang Jordan, Nueva Valencia, Sibunag kag San Lorenzo.
