ILOILO CITY- Anom ka mga Filipinos ang nalakip sa 11 ka mga tawo nga ginkasuhan bangud sa marriage fraud scheme sa Estados Unidos.
Suno sa US Justice Department, gina-arrange sang sini nga mga tawo ang ginatos nga peke nga kasal bilang kabahin sang ila katuyuan nga makaangkon sang green cards ang ila mga kliyente kabaylo sang $30,000 ukon kapin 1.5 million pesos nga bayad.
Sa affidavit nga gin- file sa Federal District Court sa Massachusetts, ginpahayag sang mga prosecutors nga nagsugod ang amo nga modus sang Oktubre 2016.
Magluwas sa ginkasuhan nga anom ka mga Pinoy nga nagatrabaho sa Los Angeles, kalakip man sa defendants ang isa ka Brazilian national samtang ang iban ang lunsay U.S. citizens.
Ang ginatudlo nga utok sang scheme amo si Marcialito Biol “Mars” Benitez, 48, nga ginaalegar naga-operate sang “agency” sa Los Angeles para sa pag-arrange sang peke nga mga kasal sa tunga sang foreign nationals kag United States citizens.
Magluwas kag Benitez, kaupod niya sa amo nga iligal nga operasyon sanday Engilbert Ulan, 39; Nino Reyes Valmeo, 45; Harold Poquita, 30; Juanita Pacson, 45; Felipe Capindo David, 49; Peterson Souza, 34; Devon Hammer, 26; Tamia Duckett, 25; Karina Santos, 24; kag Casey Loya, 33.
Ginaalegar nga sunod nga gina-preparar kag ginapasa sang mga ini ang false petitions, applications kag iban nga dokumento nga maga- substantiate sang kasal kag mag- secure sang adjustment sa immigration statuses sang kliyente.
Pagkatapos nga napares ang foreign national clients sa ila citizen spouses, nagapatigayon ang grupo ni Benitez sang peke nga wedding ceremonies sa chapels, parks kag iban pa nga lokasyon nga gina- perform sang hired online officiants.
Para sa madamo nga kliyente, ang ahensya ang nagakuha sang letrato sang undocumented clients kag citizen spouses sa atubang sang wedding decorations agud ipasa kadungan sang immigration petitions.
Kun mapamatud-an, ang charge sang conspiracy agud maghimo sang marriage fraud ang may sentensiya nga tubtob lima ka tuig nga pagkapreso.
