ILOILO – Wala sang intensyon ang anum ka police trainees sa banwa sang Sara, Iloilo nga magpahubog bangud luyag lang kuntani nila nga magpanyaga.
Ini ang ila pagpaathag sa Basic Internal Security Operations Course (BISOC) matapos naaktuhan sang Sara Municipal Police Station nga nagainom sang makahulubog nga ilimnon sa isa ka restaurant sa amo nga banwa.
Ang anum nga mga police trainees amo sanday Pat. Jean Tiongco 25 anyos; Pat. Jeseel Cordivito 26 anyos; Pat. Ma. Lorena Semilla 26 anyos; Pat. Rose May Ogboc 21 anyos; Pat. Shane Grijaldo 26 anyos; kag, Pat. Pearl Joy Araneta 25 anyos.
Sa interview sang Bombo Radyo kay Pol Lt. Col. Ernesto Macasil, pinuno sang Regional Training Service Unit-6 kag BISOC director, iya ginpahayag nga indi siya kumbinsido sa rason sang mga natungdan bangud maathag man ang ila paglapas nga ginhimo.
Suno kay Macasil, nadesisyunan nga indi na sila pagpaupdon sa mga aktibidad nga patigayunon sa BISOC.
Yara subong sa Regional Training Service Unit-6 ang mga police trainees kag ginahulat na lang ang masunod ang verbal instruction sang Police Regional Office (PRO) VI kun san-o sila paggwaon. #
