Ginkakas sa puwesto ang anom ka personnel sang Criminal Investigation and Detection Group (CIDG) nga ginaakusahan nga nagkawat sang minilyon nga balor sang ebidensiya halin sa operasyon sa Bagac, Bataan sang Oktubre 2024.
Ini matapos nadiskubrehan ang pagkawat sang mga ini sang P13M nga balor sa nakuha nga ebidensiya sa operasyon sa isa ka ginasuspetsahan nga Philippine Offshore Gaming Operator (POGO) sa Bagac.
Magluwas sa anom ka pulis, indi man luwas sa imbestigasyon ang isa ka opisyal nga gindesignar nga evidence custodian.
P141 milyon ang nakumpiska sang mga operatiba kag nasulod sa siyam ka box.
Gindala ini sa CIDG headquarters kag gindesignar nga evidence custodian si PLTCol. Jose Joey Arandia.
Apang gindala niya ini sa iya balay sang halos isa ka tuig.
Ginbalik lamang ni Arandia sa CIDG ang box sang Oktubre kun sa diin may nagbulos na iya sa puwesto.
Anom ka pulis ang ginsugo ni Arandia nga magbantay sang siyam nga box sa CIDG headquarters.
Sang Nobyembre, ginmando sang korte nga ibalik sang CIDG sa kompanya ang kwarta kag didto na natukiban nga kulang ini sang kapin P13 milyon.
Ang mga pulis nga ginkasuhan amo sanday Pat. Rolman Andaya, PEMS Erick Castro, PSMS Michael Camillo, Pat. Kenji Francisco, Pat. Jesus Fulgenci, kag Pat. Raymark Solas.
Nag-ako ang isa sa mga pulis nga gintunga nila ang kwarta.
