Makatalandog balatyagon ang anom ka tuig nga bata sa China sa iya nangin lihok sa pagsapupo sa iya nga amay.
Ang mag-amay na lang ang nagapangabuhi.
Ini bangud nga ginbayaan si Tian Haicheng, 38 anyos sang iya nga asawa kag mismo ang anak niya na lang nga anom ka tuig ang nagatatap sa iya ilabi pa nga disabled na ini bangud sa pagka aksidente sa salakyan.
Ang iya anak mismo ang nagaluto, nagapaninlo kag ginasiguro nga maayo ang kahimtangan sang iya nga amay.
Sa una, madamo ang indi makapati nga masarangan sang isa ka anum ka tuig nga bata nga himuon ang tanan nga responsibilidad apang makit-an sa video nga naglapta sa social media nga siya mismo ang nagabulong sa iya pilas, nagabulig sa pagkuha sang wheelchair kag nagahungit sa iya nga amay.
Bangud sa bulig sang anak ni Tian, nalampuwasan niya ang depresyon kag nagalaum sa maayo nga bwas damlag sang iya anak.
Madamo ang nagdayaw sa pagpalangga sang anak sa iya nga amay apang may yara naman sang may nasubuan bangud nga kuntani nagahampang pa ang bata apang ini ang wala na niya ma eksperyensyahan sa responsibilidad nga iya kinahanglan himuon agud nga mabuhi sila sang iya amay.
