ILOILO CITY – Personal nga gin-turn over ni Police Regional Office (PRO) 6 Director PBGen Rene Pamuspusan ang anom ka mga computer units sa ginpatigayon nga flag raising ceremony sa headquarters sang Iloilo City Police Office (ICPO), Enero 13.
Ang anom ka mga units ang ihatag sa anom ka police stations sa syudad.
Suno kay Pamuspusan, mabudlay sa tagsa ka police station nga mag-ubra sang reports kag office works kun wala sang available nga computer unit nga gina require sang regional kag national headquartes.
Ini ang isa man sa pinaagi sang regional headquarters nga ipakita sa mga kapulisan nga kun maayo ang ila nga performance, mahapos man para sa regional headquarters ang maghatag sang suporta sa ila.
Bangod sini, nagalaum ang regional director nga mangin mas maayo na ang paghatag sang data kag ma-comply na sang tagsa ka police station kun ano ang gina-require sa ila.
Ini man ang maka bulig sa pamunuan nga mag-assess sang performance sang tagsa ka police station tungod adlaw-adlaw na sila nga magapasa sang reports.
Natalana nga magapadulong si Pamuspusan subong sa Antique Police Provincial Office (APPO) agud nga mag turn over man sang computer units kag sa iban man nga provincial police offices ilabi na bangud ginapahayag nga maayo ang nangin performance sang mga opisyal sang nagligad nga paskwa kag bag-ong tuig.
