Ginpasakaan na sang kaso nga Robbery sang Special Investigation Task Group ang mga myembro sang “Termite Group Visayas” nga amo ang nagransak sa Iloilo Supermart sa Jaro, Iloilo City.
Ang kaso nga Robbery by Use of Force Upon Things ang pormal nga gin-file sa prosecutor’s office batuk sa mga suspek nga amo sanday:
- Alias Christopher sang Barangay Sto. Niño, Tukuran, Zamboanga del Sur nga nagaserbe nga lider sang grupo
- Alias Neil sang Barangay Nacagay, Sagada, Mountain Province
- Alias Iking nga umagad sang group leader
- Alias Boy sang Barangay Katengan, Besao, Mountain Province
- Alias Junrel sang Barangay Balonai, Midsalip, Zamboanga del Sur
- Alias Abanse sang Barangay Besao, Mountain Province
Nahibaluan nga ang robbery ang natabo sang Agosto 27, 2024.
Sa imbestigasyon, natukiban nga tatlo sa mga suspek ang positibo nga nakilala kag nakit-an na nga nagapatigayon sang surveillance sa area antes pa man ang pagpangransak.
Nakit-an sa CCTV footage ang getaway vehicle, samtang may isa gid ka puti nga van nga yara sa crime scene kag sa ila billeting location sa isa ka resort sa probinsya sang Iloilo.
Sa subong, nagapabilin nga at large ang mga suspek apang lauman nga may mga follow up operations nga patigayunon kag padayon ang intelligence coordination agud matigayon ang mga ini nga madakpan.
