Arevalo, Iloilo City – Nagdangat sa masobra 60 ka mga balay ang naguba sang buhawi nga nag-igo sa duha ka mga barangay sa distrito sang Arevalo sa Iloilo City.
Sa interview sang Bombo Radyo kay Barangay Kagawad Mercy Asiman sang Sta Cruz, Arevalo, Iloilo City, iya ginpahayag nga nagdangat sa 17 ka mga balay ang gin-igo sa ila lugar.
Anom diri ang partially damaged kag 11 ang totally damaged.
Nagdangat naman sa 46 ka mga balay ang naapektuhan sa pag-igo sang buhawi sa Barangay Sto. Domingo.
Sa nasambit nga numero, walo ang partially damaged kag 38 ang totally damaged.
Gilayon naman nga gin-evacuate sa mas hilway nga lugar ang mga residente nga apektado sang buhawi.
Isa naman ka residente sang Sta. Cruz ang nareport ng pilason matapos natumbahan sang puno sang paho ang ila balay.
Ini amo ang siyam ka tuig nga bata sa diin wala ini makagwa sa ila balay sang naglaslas ang buhawi.
Sa subong, ginahibalo sang mga otoridad ang balor sang halit nga natuga sa pag-igo sang nasambit nga buhawi.
