Nakaangkon sang minor injuries ang 60 ka persons deprived of liberty (PDL) kag 20 ka mga miyembro sang Bureau of Jail Management and Penology (BJMP) kasunod sang riot sa sulod sang detention center sa San Mateo, Rizal.
Tanan nga nasamaran ang nahatagan na sang nagakaigu nga medical attention kag subong naga-recover na.
Suno kay BJMP spokesperson Jail Chief Inspector Jayrex Bustinera, pito ka mga preso ang nagsugod sa noise barrage sa sulod sang presuhan.
Sunod sila nga ginpauntat sang otoridad apang sang naglala ang sitwasyon, nagpadala na ang BJMP sang response team halin mismo sa talatapan, Philippine National Police (PNP) kag Municipal Disaster Risk Reduction and Management Office (MDRRMO).
Biyernes sang hapon natabo ang insidente apang natapos ang standoff alas tres na sang kaagahon sang Sabado.
Ginpahayag nga nag-ugat ang insidente sa pagpamalabag sang pila ka mga preso sa cashless system sa facility bangud ginaplano sang BJMP nga maggamit na lamang sang coupon.
Padayon nga maga-imbestigar ang BJMP sa actual conditions sang presuhan kag ila staff kasunod sang amo nga gamo.
