ILOILO CITY- Nagalab-ot sa 600 ka mga kompaniya sa Shanghai ang nalakip sa prayoridad sang gobyerno sang China nga buligan agud makasugod liwat sang operasyon kasunod sang halos isa ka bulan na nga lockdown sa amo nga syudad bangud sa pagtimbuok sang COVID-19 infection.
Suno kay Bombo International Correspondent Julie Pearl Retuya, nagpasalig ang Ministry of Industry and Information Technology sang China nga pahulagon liwat sa pinakamdali nga tion ang technology, industrial kag automobile supply chains bangud ginapanan-aw nga sa mayo, dalayon na nga mapiang kag indi makabangon ang nasambit nga mga industriya.
Pahayag ni Retuya, kalakip man sa hatagan sang assistance amo ang mga firms sa computer chip, car making kag medical industries.
Nahibaluan nga base sa government statistics, yara na sa 390,000 residente sa Shanghai ang na-infect sang COVID-19 humalin sang Marso.
Samtang, nakabaton naman sang pagpakamalaot ang mga otoridad kasunod sang naglapta nga video footage kun sa diin makit-an ang mga bin bags nga may unod nga mga patay nga kuring kag ido sa higad sang dalan.
Suno kay Retuya,sa idalom sang zero-Covid policy sang China, ang sin-o man nga magpositibo sa virus ang dapat i-quarantine sa mga designated nga mga lugar.
Apang, pagkatapos nga gindala sila sa pasilidad, ginaalegar nga ginasulod sang kapulisan ang ila mga balay kag ginapatay ang ila mga sapat bangud sa kahangawa nga magpalapta ini sang virus.
