ILOILO CITY–Nagpatigayon sang public hearing ang Iloilo City Council tuhoy sa paghatag sang legislative franchise sa Prime Water Infrastructure Corporation nga amo ang magahatag sang water supply sa syudad.
Sa interview sang Bombo Radyo kay City Councilor Plaridel Nava, chairman sang Committee on Public Utilities, iya ginpahayag nga nangin madugu-on ang ginpatigayon nga public hearing bangud nga anum ka mga konsehal nga kaalyado ni Mayor Jose Espinosa III ang nagpabor samtang anum naman sa idalom ni Cong. Jerry Treñas ang nagpamalabag nga hatagan sang legislative franchise ang nasambit nga water company nga ginapanag-iyahan ni Sen. Cynthia Villar.
Ginpahayag ni Nava nga duha lang sila ni Konsehal Joshua Alim ang undecided bangud nga kinahanglan pa nila nga tun-an sang maayo ang tuhoy diri.
Mabudlay lang suno kay Nava bangud nga may panindugan na ang ila mga kaupod kag indi na mabag-o pa.
Isa man sa ginabalikid ni Nava amo ang opinyon sang Department of the Interior and Local Govermnent (DILG) sa diin nasaad sa layi nga ang National water Resources Board (NWRB) lamang ang may gahum nga makahatag sang water permits.
Nahibalu-an nga kun maaprobahan ang prangkisa sang Prime Water, nasaad sa kontrata nga magabayad ang water company sa City Government sang piso sa kada cubic meter sang tubig nga ginabaligya samtang ang taripa naman sa domestic ukon government ang yara sa P350 kada 10 cubic meters samtang P700 naman sa commercial ukon industrial.
May yara naman sang additional nga bayad nga P42 sa 11 tubtub 20 cubic meters sa domestic ukon government samtang P84 naman sa commercial ukon industrial.
Sa Phase 1 sa sulod sang isa tubtub tatlo ka tuig, 67 ka mga barangay gikan sa distrito sang Lapaz, Mandurriao, City Proper kag Lapuz anag mahatagan sang water supply.
Sa Phase 2 sa sulod sang apat tubtub 25 ka tuig, mahatagan na sang water supply ang tanan nga barangay sa syudad.
Samtang, gin-athag sang Metro Iloilo Water District (MIWD) nga wala sila nagapamalabag nga hatagan sang prangkisa ang Prime Water Infrastructure Corporation agud nga makahatag sang water supply sa syudad sang Iloilo.
Sa interview sang Bombo Radyo kay Atty. Cyril Regalado, legal counsel sang MIWD, iya ginpahayag nga limitado lang ang gahum sang isa ka Local Government Unit (LGU) sa paghatag sang prangkisa sa isa ka water company.
Santo sa layi kag sa jurisprudence, mahimo nga makahatag sang prangkisa ang LGU kun ang patindugon amo ang bulangan, merkado, slaughterhouse kag pantalan.
Kun tubig naman ang pagahambalan suno kay Atty. Regalado, dapat nga ini ang mag-agi sa joint venture agreement.
Ginpahayag ni Regalado nga “beyond authority” ukon indi na sakop sang Sangguniang Panlunsod ang paghatag sang legislative franchise sa isa ka water company.