ILOILO CITY- Patay ang senior citizen matapos ginbuno sang iya manghod sa Zone 1 Calumpang, Molo, Iloilo City.
Ang biktima ang ginkilala nga si Heidi ‘Gingging’ Concepcion Adorable, 61 anyos, samtang ang suspek naman amo si Romeo ‘Totong’ Concepcion, 52.
Sa interview sang Bombo Radyo kay Myla Gange, abyan sang biktima kag nakakita sa insidente, iya ginpahayag nga naga-inom ang iya bana kag si Totong sang nag-abot ang biktima.
Suno kay Gange, ginkakibot man nila ang natabo sang hinali lang naghunos sang kutsilyo si Totong kag ginhandus sang buno si Gingging.
Pahayag pa ni Gange, ginpunggan niya ang iya bana kag ang kamot sang suspek.
Nagpangayo siya sang tabang suno kay Gange bangud pati siya ang kun tani nadalahig man sa pagpamuno.
Gindala sa hospital si Gingging suno kay Gange apang ginbawian sang kabuhi ang biktima tuga sang naangkon nga pilas sa tiyan.
Preso na sa Molo Police Station ang suspek.
Sa interview sang Bombo Radyo kay Police Major Engelbert Banquillo, hepe sang Molo Police Station, iya ginpahayag nga gindeklarar na nga dead on arrival sahospital ang biktima.
Suno kay Banquillo, ginturn-over sa ila ang kutsilyo nga gingamit sang suspek.
Padayun naman ang imbestigasyon tuhoy sa matuod nga motibo sa biktima.
Samtang suno kay Concepcion, ginahinulsulan niya ang ginhimo kag indi niya hungod ang pagpatay sa iya magulang.
Wala man siya nakahibalo suno kay Concepcion kun ano ang iya ginpanghimo bangud sa kahulugbon.
Nahibaluan nga apisar yara na sa presuha,n nagapanghangkat sa gihapon sang away kag nagapanipa sang pader si Concepcion.
