MIAG-AO, ILOILO – Nagpasalamat si Lt. Col. Sisenando Magbalot, Jr., commander sang 61st Infantry Battalion (IB) sang Philippine Army, sa pagsakdag sang mga Local Government Units (LGU) kag pumuluyo sa militar sa pagpakig-away batok sa New People’s Army (NPA).
Ini matapos ang turn-over of command nga ginpatigayon subong nga adlaw sa 61st IB Headquarters, Camp Pedro Monteclaro, Barangay Igtuba, Miag-ao, Iloilo.
Si Magbalot ang nagpangalagad bilang 61st IB commander humalin sang Mayo 19, 2017 sa diin natigayon ang 26 ka military operations batok sa rebelde nga grupo.
Ginakabig naman ni Magbalot nga daku nga pagpanghangkat sa iya pagpamuno sa 61st IB amo ang pagpakig-away sa Komiteng Rehiyon Panay sang NPA kag nakumpiska ang madamu nga mga armas.
Si Magbalot ang pagabuslan ni Lt. Col. Joel Benedict Batara sa pagpamuno sa 61st Infantry Batallion.
Sa subong, wala pa sang pat-ud kun diin ang masunod nga assignment ni Magbalot.
