CAMP CARREON CALINOG ILOILO- Nagsugod na ang deployment sang 61st Infanty Battallion sang Philippine Army sang ila Community Support Program teams (CSP) sa lima ka mga komunidad sa banwa sang Calinog, Iloilo.
Ang deployment ang ginpangunahan ni Colonel Orlando Edralin, Deputy brigade commander sang 301st Infantry(Bayanihan) Brigade.
Suno kay Lt. Col Joel Benedict Batara, commanding officer sang 61st Infantry Battalion nagdeploy sila sang duha ka Community Support Program teams sa mga komunidad nga ginalakipan sang Guinbonyugan, Supanga, Binolosan Grande, Binolosan Pequeño kag Manaripay sa banwa sang Calinog, Iloilo.
Tinutuyo sang nasambit nga deployment suno kay Batara amo ang pagpanguna sa pagpatigayun sang programa kag serbisyo sang gobyerno.
Ang nasambit man nga mga team ang magabulig sa mga Local Government Unit kag pumuluyo sa pagpalab-ot sang ila problema partikular na sa insurgency.
Magahatag man ini suno kay Batara sang kalinong sa mga komunidad sa diin na monitor ang Communist Party of the Philippines- New Peoples Army (CPP-NPA).
Makabulig man ini agud mas mangin malapit ang gobyerno sa mga tawo.
Nagahingyo man si Batara nga suportahan sang mga taga Calinog ang militar agud maangkon ang kalinong kag kauswagan sa banwa kag sa bug-os nga probinsya sang Iloilo.
Suno naman kay Major General Dinoh Dolina, Commander sang 3rd Infantry Division, ginapanginbulahan niya ang paghatag sang Local Government Unit sang Calinog sang ila suporta sa inisyatibo sang Philippine Army sa pag-angkon sang Calinong partikular na sa Community Support Program.
Ang suporta nga ginahatag sa ila suno kay Dolina ang nagapakita sang bug-os nga pagsalig sang pumuluyo sa militar agud makaangkon sang kalinong.
Nahibaluan nagpatigayun sang send off ceremony sang Community Support Program teams sa Camp Carreon Libot Calinog Iloilo nga gintambungan sang mga opisyales sang banwa, mga opisyales nagikan sa probinsya sang Capiz, Department of Labor and Employment Regional Office 6, Department of Social Welfare and Development Regional Office 6, Department of Interior ang Local Government Region 6, Police Major Jose Nemias Pamplona hepe sang Calinog Municipal Police Station, Police Captain Byrant Fallera Officer in Charge sang Tapaz Municipal Police Station kag Mr. Ricardo Camarig Jr. Tribal Affairs Assistant.
