Tinuig na ang nagligad halin sang una nga nagtuhaw ang pangalan sang coronavirus disease 2019 (Covid-19), apang tubtub subong, may mga kilala pa kita nga wala pa nakapabakuna batok sa sini nga balatian bangud nahadlok, may yara man nga nagapang-alang-alang kag wala sang salig sa gin-agyan sang bakuna, kag may yara man nga naga-rason nga “kun tiyempo mo na, tiyempo mo gid na ya.”
Apang, nakahibalo ka bala nga may tawo nga masobra na 200 ka beses nga natublukan sang bakuna para sa sini nga balatian apang daw wala gihapon sang epekto sa iya nga immune system?
Ini amo ang 62-anyos nga tigulang halin sa Magdeburg, Germany — nga suno sa researchers halin sa University of Erlangen-Nuremberg — nakabaton sang tuman ka taas nga numero sang vaccinations sang “boluntaryo” lamang kag bangud sa “pribado nga mga rason”.
Wala ginpangalanan ang tigulang bilang pagtuman sa privacy rules sa Germany apang base sa report, 217 ka beses ini nga nakabaton sang Covid-19 shots halin sang Hunyo 2021 tubtub sang Nobyembre 2023. Sa sini nga numero, 134 ang ginkumpirma sang prosecutor kag paagi sa vaccination center documentation; samtang self-reported naman ang 83 nga nabilin.
Una nga nakilala sang researchers ang tigulang paagi sa balita kag ginpakig-angutan siya paagi sa prosecutor nga naga-imbestigar sa iya kaso sang Mayo 2022. Gin-imbestigaran ang amo nga tigulang bangud sa indi otorisado nga paggamit sang vaccination cards kag forgery sang dokumento, apang sang ulihi, wala man sang kaso-kriminal nga ginpasaka batok sa iya.
Nagpasugot man ang amo nga tigulang nga maghatag sang medical information, blood kag saliva samples.
Gin-analisar sang researchers ang iya nga blood chemistries apang wala sang nakit-an nga abnormalities nga naangot sa iya nga hypervaccination.
Ang findings sini ang ginbalhag sa medical journal nga Lancet Infectious Diseases kun sa diin nakabutang nga ang coronavirus vaccines ang may yara sang “good degree of tolerability” suno sa researchers — apang ila man gin-athag nga ini isa ka isolated case sang indi-kinaandan nga “hypervaccination.”
Suno sa team, ang amo nga tigulang ang may yara sang mas mataas ang lebel sang sang immune cells kag antibodies batok sa coronavirus ipaanggid sa iban nga mga tawo nga nakabaton lang gani sang tatlo ka vaccine doses.
Apisar sini nga findings, ginklaro sang researchers nga wala nila gina-endorso ang hypervaccination bilang estratehiya agud nga ma-enhance ang adaptive immunity.
“I don’t think any physician or public health official would recommend doing what this gentleman did. This is really uncharted territory. Talk to your doctor, follow the recommended vaccine schedules, and that should be the best thing to keep you both protected from Covid and healthy and safe,” kabahin sang advice ni Dr. Emily Happy Miller, isa ka assistant professor sang medicine kag microbiology and immunology sa Albert Einstein College of Medicine nga wala nakapasakop sa sini nga research.#
—with reports from CNN and BBC (Photo is grabbed from UNICEF)
