Napatay ang isa ka senior citizen samtang nagaboto sa Marita Elementary School sa banwa sang President Roxas sa probinsya sang Capiz.
Na-identify ang babaye nga naga-edad sang 63-anyos, residente sang nasambit nga lugar.
Natabo ini sa Precinct 71A-121A sa amo nga eskwelahan pasado alas dies kaina sang aga.
Suno kay Police Provincial Spokesperson Capt. Merry Chris Dela Cruz, samtang nagaboto ang tigulang, hinali ini nga nag-uy-uy kag nahulog sa iya ginapungkuan.
Nagtinguha pa ang medical team nga yara sa nasambit nga buluthuan nga maghatag sang first aid antes ini nga gindala sa Bailan District Hospital sa Pontevedra, Capiz, apang wala na ini nahingagaw pa kag dalayon ini nga ginbawian sang hulam nga kabuhi.
Ginasuspetsahan nga cardiac arrest ang natabo, apang ginahulat pa ang statement sang awtoridad kun ano gid ang opisyal nga rason sang iya kamatayon.
Magluwas sa sini nga kaso, may yara man sang senior citizen nga napatay man samtang yara sa polling precinct sa Albay subong nga adlaw. Ginkumpirma nga na-heart attack ini kag gindeklarar man nga dead on arrival sa ospital.
(with reports from Bombo Radyo Roxas; Photo is grabbed from Bombo Radyo Roxas)
