IRAN – Ginkumpirma sang gobyerno sang Iran ang 63 ka bag-o nga napatay bangud sa Coronavirus Disease sa ila nga pungsod sa sulod lang sang 24 ka oras.
Ini ang ginakabig nga pinaka mataas nga single-day toll humalin sang ginkumpirma nila ang ika-labing una nga napatay bangud sa COVID-19 sa Iran.
Suno kay Kianoush Jahanpour, health ministry spokesman sang Iran may yara na sang 958 ka bag-o nga kaso sang COVID-19 sa ila nga pungsod kag naglab-ot na sa 9,000 sa kabilugan.
Ginakabig man nga isa sa pinaka malala ang outbreak sang COVID-19 sa gwa sang China ang sa Iran.
Nahibaluan nga ang kapitolyo sang Tehran ang may yara sang pinaka madamo nga bag-o nga kaso sang nasambit nga balatian nga naglab-ot sa 256.
Nagapangaduha naman ang central province sang Isfahan nga may yara sang 170 ka kaso kag 63 naman sa Semnan kag nasidlangan nga bahin sang Tehran.
Sa subong, padayon ang pagpanugyan sang gobyerno sang Iran sa mga pumuluyo nga likawan ang pagbyahe.
Ginpasarado naman ang mga eskwelahan kag unibersidad lakip man ang mga hotel sa nasambit nga lugar.
