TUBUNGAN, ILOILO — Nag-gradwar sang Alternative Learning System sa Senior High School ang 64-anyos nga lola nga tumandok sang Barangay Bato, Tubungan, Iloilo.
Ini amo si Ledina Taguibe, Tribal Chieftain sang Panay Bukidnon, kag residente sang nasambit nga barangay.
Sa interview sang Bombo Radyo kay Taguibe, iya ginpahayag nga indi matakos ang iya kalipay matapos nga nakagradwar ini sa Senior High School bangud Grade 6 lang ang iya tinaposan sang Marso, 1972 bangud man kapigaduhon.
Suno kay Tabigue, pulo sila nga mag-utod nga nangin rason man kun nga nabudlayan ang iya ginikanan nga mapa-eskwela sila.
Ginpahayag man ni Taguibe nga sang nag-untat siya sang iya pag-eskwela, nagbulig ini sa iya ginikanan paagi sa pagpanguma.
Apang, paagi sa iya determinasyon, napatos sang natungdan ang iya tatlo ka mga anak, kag sa subong, may duha na siya ka mga maestra kag isa ka pulis.
Bangud man diri, nangin rason ini agud nga padayunon ni Tabigue ang iya nga pag-eskwela, sa diin, para sa iya, indi nangin mahapos bangud ssa malayo ang ila puluy-an sa eskwelahan.
Nahibaluan si Taguibe ang isa sa 432 ka labing-una nga nag-gradwar sa programa nga Alternative Learning System – Senior High School sang Department of Education, Schools Division of Iloilo.
