Nasapwan na lang nga wala na sang kabuhi ang isa ka 65-anyos nga babayi sa Zone 2, Brgy. Compania Central, Molo, Iloilo City, kagab-i, matapos ini ginpatay sang iya kaugalingon nga utod.
Suno sa mga kapulisan, gintuyo pa sang suspek nga semontohon kag ilubong ang biktima sa sulod mismo sang ila puloy-an.
Antes pa natabo ang krimen, nagbaisay ang mag-utod sang Oktubre 2 sang gab-i kag liwat man nga nagsabtanay sang Oktubre 3 sang aga matapos ginsaway sang biktima ang suspek nga nagapamanday nga ginapahayag naga-awat sa tulog sang tigulang.
Pahayag sang mga awtoridad, posible nga natabo ang krimen ginabulubanta alas-12 sa udto kahapon nga adlaw.
Matapos ang pila ka oras, ginpangita sang iban pa nila nga utod ang biktima agud tani hagadun sa ila nga pagpanyapon, apang sang nagsulod na sila sa balay sang ila utod, didto kag nakit-an ang magamo nga plastada sang puloy-an.
Kasunod sang ila pagpang-usisa, nakit-an na lang sang mga ini ang ila utod nga yara sa sulod sang cabinet sa kusina, naputos sa moskitero, kag gintuyo pa nga semontohon.
Sa imbestigasyon sang mga kapulisan, nakit-an nga may ara sang pito ka buno ang biktima sa nawala sini nga bahin sang likod, nawala nga kilid, sa liog, kag sa iya man nga butkon.
Sa subong, arestado na sang Iloilo City Police Station-4 ang suspek nga ginapahayag nadiagnose nga may schizophrenia nga isa ka mental health condition.
Ginahulat man ang mangin desisyon sang pamilya kun magapasaka pa ang mga ini sang kaso batok man sa ila nga himata.
