ILOILO CITY – Pito ka mga balay ilimnan ang ginserbehan sang immediate closure sa paglapas sa General Bar Guidelines may kaangtanan sa pagdula sang Liquor Ban sa syudad sang Iloilo.
Lakip sa mga ginserbehan sang immediate closure amo ang El Amigo Estambayan sa Brgy. San Rafael, Mandurriao, Iloilo City lakip na ang mga balay ilimnan nga yara sa sulod sang compound nga ginalakipan sang Chef Rich Resto, Bay Point, Bae, Hideout, Deoso kag Codewhite.
Magluwas sa nasambit nga mga balay ilimnan, ginserbehan man sang immediate closure ang Saja nga yara sa guwa sang compound sang El Amigo Estambayan.
Mismo sanday Mr. Nestor Canong, pinuno sang Task Force on Moral and Values Formation kag Mr. Norman Tabud, pinuno sang Business Permits and Licensing Office, ang nagpanguna sa composite team nga nagserbe sang immediate closure subong nga gab-i.
Sa interview sang Bombo Radyo kay Mr. Nestor Canong, iya ginpahayag nga ang El Amigo Estambayan kag ang anum ka mga balay ilimnan nga yara sa sulod sang compound ang binulan na nga naga-operate apang wala sang business permit.
Suno kay Canong, kabahin sang violations amo ang pagpahanugot sang mga minor de edad nga makasulod kag mag-inom sang makahulubog nga ilimnon, kakulang sang security personnel, kakulang sang Closed Circuit Television camera kag pagpahanugot sang pagpanigarilyo sa sulod sang commercial establishment.
Ginpahayag ni Canong nga posible nga buwas nga adlaw, ginabanta nga tatlo pa ka mga commercial establishent ang pagaserbehan sang immediate closure.
Ang pagserbe sang immediate closure suno sa natungdan ang nagapakita lang nga seryoso ang Iloilo City Government sa mga ginapatuman nga pagsulundan.
Samtang, suno naman kay Mr. Norman Tabud, immediate closure ang ginmandu ni Iloilo City Mayor Jerry Treñas batok sa pito ka commercial establishment bangud nga wala sang business permit ang mga nasambit nga balay ilimnan.
Suno kay Tabud, wala nagabaton sang permit application ang Business Permit and Licensing Office kun indi kumpleto ang ginpasa nga rekisitos.
Sa pagkamatuod suno kay Tabud, kun kumpleto lang ang rekisitos, mahimo nga maproseso ang business permit sa sulod sang isa ka oras.
Kun tani suno sa natungdan, magserbe nga leksyon sa tanan nga commercial establishment ang natabo sa 7 ka balay ilimnan nga ginpasirado gilayon sang alkalde bangud sa multiple violations sa General Bar Guidelines.
Samtang, depensa naman ni Mr. Carl Delgado, manager sang El Amigo Estambayan, ginaproseso na ang ila nga business permit.
Tuhoy naman sa kun nga-a atrasado ang pagkuha sang business permit, ginpahayag sang natungdan nga wala siya sang ihibalo.
Ginpahayag ni Delgado nga wala man sila sang may nabaton nga kopya sang General Bar Guidelines.
