Ginpasakaan sang kaso sa korte ang isa ka 68-anyos nga babayi sa Zurich matapos gin-akusaran nga nagapakaon sang kuring sang iya tupad balay sa sulod sang 10 ka bulan.
Suno sa reklamo sang biktima, ginpakaon sang pensionada nga babayi ang ila kuring nga si Leo bisan pa man nga ginpaandaman na siya sa sulat nga untatan ang iya gina-ubra.
Sa baylo nga mag-untat, ginbutangan pa sang babayi sang cat flap ang iya pwertahan agud makasulod kag makagwa ang amo nga kuring.
Bangud sini, nag-untat na si Leo sa pagbalik sa iya tag-iya kag wala na ginakaon ang ginahanda nga pagkaon para sa iya.
Gani, nagsumiter sang pormal nga reklamo ang tag-iya sa public prosecutor’s office, nga nagresulta sa multa nga 800 Swiss francs (mga ₱54,000), kag suspended fine nga 3,600 francs (mga ₱244,000) para sa “unlawful appropriation” ukon pagpang-angkon sang indi iya nga kabuhi.
Apang, nagpanginwala ang 68-anyos nga babayi nga bayaran ang multa, rason nga nakalab-ot ini sa korte.
Suno sa layi sa Switzerland, indi sala ang magpakaon sang kuring sang iban nga tawo kun indi lang permi-permi.
Nag-atubangay na duha ka mga personalidad sa Zurich District Court upod ang ila tagsa-tagsa nga mga abogado sa isa ka closed-door hearing.
Sa katapusan, ginpasugtan na sang tag-iya ang babayi nga padayon nga magpabilin si Leo sa iya, kag gin-bawi sang tag-iya ang reklamo.
