ILOILO CITY – 68 ka pamilya ang temporaryo nga nagatinir sa evacuation center kasunod sang daku nga sunog nga nagluntad sa Brgy.Ortiz, Iloilo City sa diin 100 ka pamilya ang apektado.
Sa interview sang Bombo Radyo kay Punong Barangay Shiela Doza, iya ginpahayag nga 18 ka hulot ang ginpagamit sang pamunu-an sang University of Iloilo-PHINMA para sa mga nasunugan.
Suno kay Doza, ang iban sa mga nasunugan ang nagtinir sa ila mga himata sa kaiping nga mga barangay.
Ginpahayag ni Doza nga nakabaton naman sila sang relief goods apang lubos nila nga ginakinahanglan amo ang matinlo nga tubig, habol, ulunan kag iban pa nga gamit pangtulog.
May kaangtanan diri, handa nga maghatag sang matinlo nga supply sang tubig ang Flo Water Resources Iloilo Inc. nga kabahin sang Florete Group of Companies, agud nga may magamit ang mga nasunugan.
