ILOILO CITY- Gina-finalize na sang Iloilo Provincial Government ang appeal letter nga ipadala sa National Task Force Against Covid19 nga nagahingyo nga untaton anay ang pagpapauli sa mga Locally Stranded Individuals.
Sa interview sang Bombo Radyo kay Iloilo Governor Arthur Defensor Jr., iya ginpahayag nga katuyuan sini nga mauntat ang pagtaas sang kaso sang Coronavirus disease 2019 sa rehiyon sa diin kalabanan nga mga nagpositibo ang mga Locally Stranded Individuals.
Suno sa gobernador, ini agud malikawan man ang pag-alawas sang mga Locally Stranded Individuals sa mga quarantine facilities sa Western Visayas.
Pahayag pa sang gobernador, indi man tanan nga nagapauli ang matuod-tuod nga stranded bangud ang iban ang naga-migrate lang.
Dugang pa sang opisyal, nahangpan niya nga kinahanglan sang mga tawo nga magpauli sa ila mga lugar apang lain ang tiempo subong sa diin yara sa community quarantine status ang bilog nga pungsod kag indi dapat makompromiso ang containment strategies.
Samtang, umpisahan na ang pagtukod sang Covid testing building nga may budget nga P9 million sa Iloilo Provincial Hospital sa Pototan, Iloilo.
Apang suno sa gobernador, ang reverse transcription-polymerase chain reaction machine nga ginpurchase sang provincial government ang pagadal-on sa Western Visayas Medical Center Subnational laboratory.
Nagalaum naman ang gobernador nga sa subong nga semana, ideliver na ang nasambit nga machine agud gilayon nga magamit.
Nahibaluan nga isa lang ka machine ang ginagamit sa covid-testing sa Western Visayas Medical Center Subnational laboratory bangud indi compatible sa test kits ang tatlo ka iban nga machines.
