UAE – Nakapa-inject na sang ika duha nga dose sang COVID-19 vaccine ang Ilonggo Nurse sa United Arab Emirates nga isa sa mga nagboluntaryo agud mangin human subject sa ginapatigayon nga clinical trial.
Sa exclusive interview sang Bombo Radyo kay Ramon Francisco Sonico sang Sta. Barbara, Iloilo, iya ginpahayag nga manugtapos na ang iya pito ka adlaw nga monitoring sang body temperature.
Suno kay Sonico, kasubong man nga proseso ang iya gin-agyan sa pagpa-inject sang una nga dose sang bakuna nga gin-develop sang China-based company paagi sa partnership sa UAE government.
Ginpahayag ni Sonico nga sa Setyembre 12 ang iya masunod appointment para sa blood test agud matumod kun bala reactive ang iya lawas sa bakuna.
Normal lamang suno kay Sonico nga may mabatyagan nga hilanat matapos ang injection apang sa iya bahin, wala siya sang may nabatyagan nga side effects.
Sa subong, wala pa natapos ang phase 3 sang clinical trial kag kun matapos na, gilayon nga umpisahan ang phase 4 kag daku na ang chansa nga mangin available sa merkado ang bakuna batok sa COVID-19.
Nahibalu-an nga ang Ilonggo Nurse ang isa lamang sa ginabanta 45,000 nga nag-volunteer agud mangin human subject sang nasambit nga bakuna.
