ILOILO CITY- Nagpasar sang resolution ang Sangguniang Bayan sang Leganes, Iloilo nga nagaduso nga mapaidalom ang banwa sa franchise area sang More Electric and Power Corporation (MORE Power).

Ini may kaangtanan sa reklamo sang mga konsumidor sa mahal nga sukot sang kuryente sang Iloilo Electric Cooperative (ILECO) 1 nga amo ang electric distributor sa banwa.

Sa interview sang Bombo Radyo kay Sangguniang Bayan Member Samson Jaspe, iya ginpahayag nga sa sulod sang pila ka dekada nga serbisyo sang ILECO 1,nagataas lang nga nagataas ang rate sang kuryente.

Suno kay Jaspe, ang mahal nga rate man sang kuryente ang isa sa rason kun ngaa wala madayon ang special economic zone sa banwa bangud wala sang mga negosyante nga interesado mag-invest sa banwa.

Nagalaum naman ang opisyal nga hatagan sang atensyon ni Iloilo 2nd District Representative Michael Gorriceta ang ila nangin tikang.

Una na nga nagpasar ang banwa sang Pavia sang kaangay nga resolusyon sa pareho man nga rason.