Naghingabot file sang certificate of candidacy (COC) para sa pagka-presidente si Senator Ronald “Bato” dela Rosa, Oktubre 8 — isa ka surprise move halin sa ruling party nga PDP-Laban.
Mangin runningmate ni dela Rosa si Senator Bong Go.
Sunod nga ginpahayag sang PDP-Laban Faction nga matabo ang “Ba-Go 2022″… apang indi tanan ang nagapati sini.
May iban nga nagasiling nga taktika lang ini sang PDP-Laban bangud ang matuod gid nga standard bearer amo ang presidential daughter nga si Davao City Mayor Sara Duterte-Carpio.
Ang amo nga presidential daughter ang una na nga naka-file sang COC agud magpa-eleher liwat bilang alkalde sa Davao City.
Apang sang nag-file sang COC si Bato, talalupangdon nga suksok sini ang Hugpong ng Pagbabago party shirt, ang regional party ni Sara Duterte.
Sunod nga nagtunog ang espekulasyon nga may substitution nga matabo.
SUBSTITUTION: SIN-O ANG PWEDE?
Ginpaathag ni Atty. Wilfred Jay Balisado, regional director sang Commission on Elections (Comelec), ang ginatawag nga substitution sang mga kandidato.Una, ang substitution ang indi applicable para sa mga independent candidate. Kun i-iwithdraw sang political aspirant ang iya gin-file nga COC, “that’s the end of it” suno kay Balisado.
Ikaduha, kun ang aspirant nga maga-withdraw sang COC ang nagapadalagan sa idalom sang isa ka political party, mahimo maka-nominate ang partido sang isa ka kandidato nga magabulos sa kun sin-o man ang nag-withdraw.
Tubtub sa Nobyembre 15 mahimo ini nga tikang apang dapat nga may yara sang “valid withdrawal kag valid substitution.”
Kinahanglan nga ang maga-substitute nga kandidato ang may yara sang Certificate of Nomination and Acceptance (CONA). Dapat man nga miyembro sang isa ka political party ang maga-substitute nga kandidato.
Suno kay Balisado, pwede na nga maka-withdraw kag ma-file ang substitution umpisa subong tubtub sa Nobyembre 15.##
