Wala sang daku nga epekto kag halit nga nabilin sa Western Visayas ang 7.4 magnitude nga linog nga nagtay-og sa Manay, Davao Oriental kahapon sang aga, Oktubre 10.
Ini ang ginkumpirma ni Office of Civil Defense (OCD) Region 6 Director Raul Fernandez sandig man sa nabaton nga mga report sang talatapan.
Pahayag sini, lunsay precautionary measures ang ginhimo kaangay sang kanselasyon sang klase kag mga suspension sang trabaho pareho sa ginhimo sa syudad sang Iloilo.
Matandaan nga Intensity III ang nabatyagan sa Iloilo City; Intensity II sa Northern Iloilo; kag Intensity I naman sa probinsya sang Capiz.
Nagpahanumdom ang direktor nga katungdanan sang lokal nga panguluhan nga siguruhon kag i-check nga mabakod ang mga estruktura agud makalikaw sa trahedya.
Magluwas diri, nagpanawagan man ini sang aktibo nga partisipasyon kun may yara sang Nationwide Simultaneous Earthquake Drill (NSED) nga ginahimo sa kada tatlo ka bulan sa Pilipinas. Ini amo ang pagpreparar sang ahensya sa mga tawo ilabi na sa posible pag-abot sang ‘The Big One’ ukon ang potensyal nga 7.2 magnitude nga linog.
Nahibaluan nga sa latest report sang DOST-PHIVOLCS, nagdangat na sa 808 aftershocks ang na-rekord kasunod sang magkasunod nga linog sa Davao Oriental. 13 sa sini nga aftershocks ang nabatyagan gid suno sa ahensya. Naglab-ot naman sa 5.8 ang pinakamabaskog nga na-rekord.
Una na ginpahayag sang Phivolcs nga mahimo makonsiderar nga “doublet earthquake” ang natabo.#
