Target sang ‘Dapat Isa Lang’ Coalition sang 7.5 milyon ka pirma agud nga makumpleto ang kinahanglanon sa ila People’s Initiative nga nagapanawagan sang anti-political dynasty law.
Sa interview sang Bombo Radyo kay Atty. Alex Lacson, president sang ‘Dapat isa lang’ coalition, iya ginpahayag nga kinahanglan ang at least 10% sang registered voters sa bilog nga Pilipinas kag at least 3% sang voters sa kada congressional district ang magpirma sa petition.
Suno kay Attty. Lacson, isa sa mga rason nga ginaduso nila ang anti-political dynasty law sa pungsod bangud nga ginakabig nga ang pila sa mga daku nga corruption scandals sa Pilipinas may kaangtanan sa political dynasties.
Pahayag sang abogado, kinahanglan na nga mabugtawan ang Pilipinas kag tion na agud nga mauntat ang political power sa isa ka pamilya.
Pagpaathag man ni Atty. Lacson, kun makumpleto ang kinahanglanon nga pirma, iga-sumiter ang petition sa Commission on Elections ukon Comelec para sa national referendum, kun sa diin ang mga botante mismo ang magadesisyon kon aprobahan ukon indi ang proposed law.
Gina-agda gid niya ang publiko nga mag-upod sa ila People’s Initiative kag mangin isa sa mga nagasuporta sa anti-political dynasty law.
