Patay ang pito ka tuig nga bata matapos mabunggoan sang depampasahero nga jeep sa Barangay Jayubo, Lambunao, Iloilo.
Ang jeep ginamaneho ni Alyas Efren, 56-anyos kaupod ang iya bata nga konduktor nga lunsay residente sang Barangay Bagongbong, Lambunao.
Sa interview sang Bombo Radyo kay Police Captain Jose Winston Biadog, Deputy Station Commander sang Lambunao Municipal Police Station, iya ginpahayag nga mapauli kuntani halin sa namatyan ang bata kaupod ang iya magulang nga siyam ka tuig sa ila balay nga sa tabuk gid lamang sang karsada sang hinali lang nga naglabay ang depampasahero nga jeep sang Lambunao kag nabunggoan kag natapakan ang ulo sini.
Suno kay Biadog, nakit-an pa sang magulang nga may padulong nga jeep amo nga nag atras ini apang nakabuya ang kamot sang iya manghod.
Nakit-an sang mga ginikanan kag kaparyentehan sang mga bata ang natabo sa atubang sang namatyan rason man nga ginsapote nila ang driver.
Bangud sang pagsapote, nakaagum ini sang mga pilas kag head injury nga subong nakatalana nga ipa-CT scan sa Western Visayas Medical Center.
Dugang ni Biadog, wala pa sila nakaistorya sang pamilya kung magapasaka sang kaso batok sa driver.#
(Article: Bombo Hanna Joy Andasa)
