ILOILO CITY – Ginkalipay sang hepe sang Mandurriao Police Station matapos nga pito ka barangay sa distrito sang Mandurriao ang nalakip sa drug-cleared barangay sa syudad sang Iloilo.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga sa 18 ka barangay sa distrito sang Mandurriao, 13 ang nag-apply nga mangin drug-cleared apang pito lang ang nakapasar.
Suno kay Valencia, wala siya naglaum nga magalab-ot pa sa pito ang madeklarar sang regional oversight committee nga drug-cleared.
Ginpahayag ni Valencia nga indi man mahinago nga ang Barangay Bakhaw ang kilala kun illegal drugs ang pagahambalan.
Ang nasambit nga barangay suno sa hepe ang wala nag-apply agud nga mangin drug-cleared bangud nga nahibalu-an man mismo sang mga barangay official nga indi nila matuman ang parameters sang regional oversight committee.
Sa subong suno sa natungdan, madamu pa sa gihapon sang drug personalities nga yara sa nasambit nga barangay.
Nahibalu-an nga lakip sa mga barangay nga nadeklarar nga drug-cleared amo ang Calajunan; Guzman-Jesena; Pali-Benedicto; San Rafael; PHHC Block 17; PHHC Block 22 kag Dungon C.
