ILOILO CITY – Ginatutukan karon sang Iloilo Police Provincial Office (IPPO) ang pito ka mga natumod nga criminal groups nga naga-operate sa probinsya sang Iloilo.
Sa interview sang Bombo Radyo kay Police S/Insp. Rolando Aranio, spokesperson sang IPPO, ginpahayag sini nga apat sa mga criminal groups nga ang nabase sa Fifth District.
Ini ang ginalakipan sang banwa sang Sara, Estancia, Lemery kag San Rafael samtang tatlo naman ka grupo ang natumod sa Third District.
Nagpamalibad naman si Aranio nga hingadlan ang mga grupo bangud may nagapadayon nga police operations batok sa mga ini.
Ang mga grupo nga natumod ang ginatudlo responsable sa serye sang pagpamatay indi lang sa probinsya sang Iloilo kundi sa kaiping man nga mga kaprobinsyahanan kag involve man sa robbery-holdup kag iligal nga droga.
Nagapati ang IPPO nga nagahimbunanay ang nasambit nga mga grupo sa ila iligal nga transaksiyon nga amo naman ang tuyo tapnaon sang pamunuan sang IPPO suno kay Aranio.