Nasapwan na lang nga wala na sang kabuhi ang pito ka mga indibidwal sa abandonado nga gold mine sa Itogon, Benguet.
Suno kay Engr. Cyril Batcagan, head sang Municipal Disaster Risk Reduction and Management Office (MDRRMO) sang Benguet, wala gilayon nareport sa mga awtoridad ang nasambit nga hitabo, rason nga wala man sila nakapadayun sang nagakaigo nga imbestigasyon.
Base sa reports, 18-anyos ang pinakabata nga biktima, samtang 62-anyos naman ang pinakatigulang.
Pahayag sang MDDRMO, dako ang posibilidad nga biktima sang gas poisoning ang pito ka mga indibidwal nga nagbawi gid sang ila kabuhi.
Suno kay Engr. Batcagan, nagakatabo ang gas poisoning sa sulod sang tunnel kun may ara sang natipon nga madamo nga kemikal ukon elements halin sa duta ukon tubig.
Dugang pa niya, wala na nila makit-an ang sitwasyon sang mga biktima matapos ang mga ini nga ginkuha dayun sang ila himata kasunod sang insidente.
Ginpakigbahin man sini nga wala sang nabatun nga impormasyon sang natukiban ang mga bangkay.
Nahibaluan nga pagatun-an pa sang mga awtoridad sa Benguet ang nasambit nga insidente kun sa diin posible man ang pagpasira sang nasambit nga tunnel.
