[WARNING | Violence]
Patay ang 7 ka tuig nga bata matapos ginkastigo sang iya kaugalingon nga amay kag pila ka beses nga ginlampos sa dalan sa Phase 1, Villa San Isidro, Brgy. San Isidro, Rodriguez, Rizal.
Sa isa ka CCTV footage, nakit-an nga hublas ang lalaki nga nagahakwat sa bata kag naglampos sini sa semento.
Nakit-an ang nagdalalagan nga mga kasilingan nga nagtinguha nga pauntaton ang lalaki kag nagtinguha pa nga agawon ang bata.
Wala gid nasapar kag natam-an ang bata sa naangkon nga injuries rason nga ginbawian sang kabuhi.
Gin-aresto ang amay apang napatay man samtang yara sa selda.
Suno sa Rodriguez Police Station, hungod nga ginbunggo sang amay ang iya nga ulo sa dingding tubtub nga nadulaan ini sang animo.
Gindala ini sa ospital apang gindeklarar nga dead-on-arrival.
IMPLUWENSYA SANG ILIGAL NGA DROGA
Antes ang insidente, ginapahayag nga gintinguhaan na sang asawa nga indi pagpaguwa-on ang iya 25 anyos nga bana sa ila nga balay bangud sa makaduluda nga hulag sini nga ginapahayag tuga sang paggamit sini sang iligal nga droga.
Suno sa Rodriguez Municipal Police Station, ginkandaduhan ini sang asawa, apang naka-guwa kag didto na ginlagas ang ila nga bata.
Ginkumpirma man sang pulis nga may daan na ini nga rekord sa paggamit sang iligal nga droga. ##
