ILOILO CITY – Nagakadapat nga giyahan sang ginikanan ang ila kabataan nga likawan anay ang paghampang sa guwa sang balay ilabi na ang mga yara naga-istar sa highly populated area.
Ini ang panugyan sang COVID-19 team sang Iloilo City Government kasunod sang pagpositibo sa virus sang isa ka pito ka tuig nga bata sa Brgy. Bolilao sa distrito sang Mandurriao kun sa diin nagpositibo man sa balatian ang mga ginikanan kag ang playmates sang nasambit nga pasyente.
Sa interview sang Bombo Radyo kay Jeck Conlu nga nagaserbe nga COVID-19 spokesperson sang Iloilo City Government, iya ginpahayag nga ang pito ka tuig nga bata ang gindala sa hospital matapos naka-angkon sang pilas bangud sa paghampang kag bangud nga protocol, ginpaidalom sa COVID-19 test ang nasambit nga pasyente.
Suno kay Conlu, sa ginpatigayon nga contact tracing, nagpositibo man sa virus ang pamilya kag ang playmates sang bata kag ang pasyente ang nalatnan man lang sang mga kaupod niya sa balay.
Santo sa record sang complaince team, ang Brgy. Bolilao ang nagapanguna sa may pinakamadamo nga violator kun pagsunod sa minimum health protocol ang pagahambalan.
