Pito ang kumpirmado nga napatay sa aksidente nga natabo sa Magsangyaw, Tupi, South Cotabato subong nga hapon sang Lunes, Disyembre 23,2024.
Sa inisyal nga impormasyon gikan sa mga otoridad, nagsaka ang mga himata sa Magsangyaw Land of Praise tourist spot sakay sa L300 Van agud maghimo sang pictorial para sa ila mga himata nga magpakasal.
Sang natapos na ang photo shoot kag papuli na sila, nadulaan sang preno ang ila salakyan samtang nagapanaog halin sa mataas nga bahin sang lugar kag nadulaan naman sang kontrol ang driver.
Bangud sa kabaskugon sang impact, halos maguba ang pila ka parte sang salakyan, sa diin, nagkalatabog ang mga sakay sini.
Gilayon naman nga ginpatigayon ang rescue operation sa mga pasahero, apang pito gid ang wala nakaluwas.
Yari ang mga pangalan sang mga biktima:
Annabelle Maglente – 52 anyos, Joan Maglente – 28 anyos, Joel Maglente, Duke Maglente kag Ike Maglente nga lunsay taga Cagayan de Oro City nga bag-o lang nagbakasyon sa banwa sang Polomolok, samtang ang duha ka menor de edad nga sanday Marga, 7 anyos kag Yuna , 8 anyos kag taga Polomolok, South Cotabato nga himata man sang mga Maglente’s.
Buhi naman ang driver sang van nga amo si Oliver Maglente apang may pilas sa nagkalain-lain nga bahin sang iya lawas.
Sa subong, gindala na sa morgue sang Tupi Municipal Hospital ang bangkay sang mga biktima.
