Patay ang pito ka Qatari kag Turkish citizens matapos nagtibusok ang military helicopter sa Qatar.
Nasapwan naman ang lawas sang mga biktima matapos ang insidente.
Suno sa inisyal nga imbestigasyon, may technical malfunction, apang ginahibalo pa ang dugang nga mga rason sa likod sang trahedya nga natabo kadungan sang training exercise.
Suno sa Turkey kag Qatar, ang mga nakasakay sa helicopter amo ang apat ka Qatari military personnel, isa ka Turkish serviceman, kag duha ka technicians halin sa Turkish defense company.
Nahibaluan nga may military base ang Turkey sa Qatar kag may yara sang defense agreement sa tunga sang duha ka pungsod halin pa sang 2014.
Natabo ang pagtibusok sang helicopter samtang padayon man ang bombahanay sang US kag Israel sa Iran, nga ginabalusan naman sang Tehran paagi sa pag-atake naman sa mga kaalyado sang duha ka pungsod sa Gulf.
