ILOILO CITY- Nagdangat sa masobra 7,000 kilograms sang meat products ang nakumpiska sang Bureau of Animal Industry nga ginapatihan kontaminado sang African Swine Flu virus sa Western Visayas.
Sa interview sang Bombo Radyo kay Dr. John Roel C. Hilario, Regional Veterinary Quarantine Officer sang Bureau of Animal Industry Region 6, iya ginpahayag nga ang nasambit nga mga meat products ang nakuha sa mga domestic kag international seaports kag airports.
Suno kay Dr. Hilario,hugot ang ila ginapatuman nga monitoring agud indi makalusot ang mga karne sang baboy nga kontaminado sang African Swine Flu virus.
Ginpahayag ni Dr. Hilario, nga sa bulig sang local government unit (LGU) kag sang Department of Agriculture, mas mahapos ang pagbantay agud indi maglapta ang African Swine Flu virus.
Katungdanan naman sang Local Government Unit suno sa beterinaryo ang pagbantay sa mga hotels kag restaurants nga nagagamit sang imported nga baboy sa ila pagluto sang mga pagkaon.
Gilayon naman nga ginalubong ang mga nakumpiska nga karne sang baboy kag wala na ginapaidalom pa sa mga tests.
Nahibaluan nga hugot nga ginadumilian ang pagpasulod sang karne sang baboy halin sa Luzon nga amo ang tuman nga naapektuhan sang African Swine Flu virus.
