Ginakabig sang isa ka 70-anyos nga babayi nga milagro ang iya pag-angkon sang kapid nga anak sa pihak sang iya edad.
Ini amo si Safina Namukwaya, tumandok sang Uganda nga ginlaragway sang Women’s Hospital International and Fertility Centre nga amo ang pinakatigulang nga iloy sa Africa nga nakabata pa apisar sang iya katigulangon.
Nagapabilin sa ospital si Safina kaupod sa iya nga baby girl kag baby boy apang maayo gid ang ila nga kondisyon. Napaguwa ang kapid paagi sa caesarean.
Photo: Women’s Hospital International and Fertility Centre/FB
Malipayon man nga gin-anunsyo sang fertility centre nga napatigayon ini paagi sa in vitro fertilization (IVF) treatment ukon ang proseso kun sa diin ginakuha ang itlog sa ovaries sang babayi kag gina-fertilize sa sperm sa laboratoryo.
Photo: Women’s Hospital International and Fertility Centre/FB
Ang na-fertilize nga itlog ukon ginatawag nga embryo amo ang ginabutang sa taguangkan sang babayi agud nga mag-develop.
Ginpakigbahin ni Safina nga nangin mabudlay ang iya pagbusong bangud wala nagpakita ang amay sang iya mga anak sang nahibaluan sini nga kapid ang iya ginadala.
“Men don’t like to be told that you are carrying more than one child. Ever since I was admitted here, my man has never showed up,” pahayag sini. Apisar nadulaan sang partner, malipayon si Safina bangud duha ka bag-o nga blessings ang nag-abot sa iya nga kabuhi.
Ini na ang ikatatlo nga delivery ni Safina sa sulod sang tatlo ka tuig. Sang 2020, nakaangkon man siya sang isa ka baby girl. Una na niya ginpakigbahin nga luyag gid niya magka-anak bangud madamo ang nagasuya sa iya halin sang napatay ang iya una nga bana sang 1992 nga wala gid sila nakaangkon sang bata.#
