Sa edad kun sa diin kadam-an sa mga babaye ang masako na sa paghampang sa ila mga apo, may Indian nga babaye nga 70 anyos na ang edad apang nakabun-ag pa sa iya pinakauna nga anak.
Si Jivuben Valabhai Rabari kag ang iya nga bana ang madugay na nga nagatinguha nga magbusong apang sa sulod sang 45 ka-tuig nga pag-updanay, napaslawan ang mga ini nga magka-anak.
Bangud sa handum sang babaye nga makabun-ag, nagpa-idalom ini sa in vitro fertilization (IVF) treatment.
Suno kay Dr. Naresh Bhanushali, 20 ka-tuig na siya nga naga-conduct sang linibo nga IVF treatment kag wala pa siya sang may nakit-an nga pinasahi nga kaso sa diin makabig niya nga milagro ang madinalag-on nga pagbusong kag pagbun-ag sang tigulang.
Dugang pa sang doktor, ginkalipay nila nga successful ang nangin pagbun-ag sang 70 anyos apang ginahingyo nila sa gihapon ang pumuluyo nga indi mag-attempt sa pagbun-ag kun tigulang na bangud dako ini sa gihapon nga risgo sa ikaayong lawas.
