ILOILO CITY – Ginkumpirma ni Iloilo Fifth District Rep. Raul Tupas ang anomalya sa scholarship program sang iya utod kag anay kongresista nga si Niel Tupas Jr.
Sa interview sang Bombo Radyo Iloilo, ginpahayag sang mamalidha nga wala ginbayaran sang iya utod ang masobra P70 million para sa scholarship program sini sa Northern Iloilo Polytechnic State College.
Ini ang rason nga ginakahangaw-an nga indi makatapos ang nasambit nga mga iskolar samtang ang iban, indi makakuha sang mga requirements kaangay sang Transcript of Records.
Ang mga apektado suno kay Rep. Tupas, amo ang mga scholars nagikan sa banwa sang Estancia, Ajuy, Batad, Barotac Viejo, Concepcion, Lemery kag Sara sa Fifth District sang Iloilo.
Suno sa kongresista, iya idangop kay Special Assistant to the President Bong Go ang anomalya nga ginhimo sang iya utod.
Madumduman nga nag-away ang mag-utod matapos nga nagdalagan ang misis ni Niel Tupas Jr. sa pagka-kongresista sa Fifth District, kontra kay Rep. Raul Tupas.