ILOILO CITY – Magatiglawas sang Pilipinas ang duha ka mga Ilongga (overseas Filipino worker) OFW sa Hong Kong para sa cricket sa Fairbreak International 2022 nga hiwaton sa Dubai sa Mayo 10-15, 2022.
Ang duha ka mga Ilongga OFW amo sanday Christine Joy Lovino sang Barangay Salacay, Cabatuan, Iloilo kag Jenniffer Alumbro sang San Enrique, Iloilo.
Sa interview sang Bombo Radyo kay Christine Joy Lovino, myembero sang SCC Divas, iya ginpahayag nga napilian sila ni Alumbro nga magtilawas sa pungsod pagkatapos sang naghampang ang mga ini sa domestic league kun sa diin, nakitaan sila sang maayo nga performance.
Sila ang naghampang sa idalom sang Ticket Hong Kong dala ang pangalan sang SCC Divas Cricket Team.
Ang SSC Divas ang gintukod ni Josie Arimas sang Negros Occidental nga anay myembro sang Philippine Women’s National Softball Team sang 2017 kaupod ang ila founder kag manager nga si Anemish Kulkarni kag Indian coach nga si Chandra Paramereswaran.
Suno kay Lovino, maka-upod nila ang iban pa nga players nagikan sa 36 ka mga pungsod.
Dugang pa iya, ang nagtrabaho sa Hong Kong sang 2015 kag nangin kabahin sang SCC Divas Team sang 2018.
Apisar nga wala pa nagbukas ang mga training centers sa lugar bangud sang pamahog sang COVID-19, nagapadayon ang home workout nanday Lovino.
Indi man mabudlay suno kay Lovino nga mangin kabahin sang team bangud anum ka adlaw ang trabaho kag ang isa ka adlaw ang para sa training.
Sa training, naga-enjoy sila ni Alumbro bangud daw kaangay nga pamilya na ang pagkabig nila sa ila nga team mates.
Plano man sang duha nga magbalik sa Iloilo agud nga i-introduce ang hampang nga cricket.
Nahibaluan nga si Lovino ang overall women development most valuable player samtang, si Alumbro naman ang overall fielder of the year.
