ILOILO CITY – Gin-veto ni Presidente Rodrigo Duterte ang ginaduso nga hagna nga himuon nga mandatory ang pag-register sang tanan nga SIM card kag social media accounts.
Suno kay acting presidential spokesperson Martin Andanar, nagapati si Duterte nga kinahanglan pa nga tun-an sang maayo ang ginaduso nga SIM Card Registration Act.
Suno kay Andanar, ginpahayag sang presidente nga ang paglakip sang social media providers sa registration requirement ang indi kabahin sang original version sang hagna kag kinahanglan nga tun-an pa sang maayo.
Dugang pa ni Andanar, nakita sang presidente nga may pila ka aspeto sang state intrusion kag may mga regulasyon nga wala na-define sang maayo, wala na plastar kag wala na-separar sa hagna ang social media registration.
Naintindihan sang presidente ang tinutuyo ang mga mamalidha agud nga malikawan ang cybercrime incidents apang suno kay Andanar, ang paglakip sa social media ang wala naplastar sang maayo.
Nagapati ang presidente nga makatuga ini sang state intrusion kag surveillance nga makatuga sang pamahog sa kinamatarong sang tawo.
Tuyo lamang sang presidente nga maproteksyunan ang “privacy” kag “free spech” sang Pilipino.
Apisar sini, nagalaum ang presidente nga indi mag-untat ang Kongreso sa paghimo sang mga tikang agud nga mapabilin ang “safe” kag “secure” nga online environment sang mga Pilipino.
Nahibaluan nga gin-ratify sang senado kag kongreso ang bicameral conference committee report sang hagna sang Pebrero 2 subong nga tuig.
Ang internet and information and communications technology (ICT) rights advocacy group nga Democracy.Net.Ph ang una na nga nagpanawagan sa presidente nga i-veto ang nasambit nga hagna bangud indi ini ang solusyon sa problema sa cybercrime kag mga trolls.
