Wala nakaupang ang kapigaduhon agud mapaeskwela sang mag-asawa nga mangunguma kag housemaker ang ila apat ka mga kabataan sa diin isa na diri ang Valedictorian sang Philippine National Police Academy Alab-Kalis Class 2022.
Ini amo si Police Cadet Ernie Alarba Padernilla, residente sang Barangay Dalicanan, Passi City.
Si Padernilla, ang nag-graduate bilang labing-una nga Magna Cum Laude sa kurso nga BS Criminology sa Passi City College sang tuig 2017.
Tuig, 2017, nakapasar si Padernilla sa Criminology Board Examination kag sa amo man nga tuig, nagkuha ini sang Admission Test sa Philippine National Police Academy tubtub nakasulod sa akademya sang 2018.
Sa interview sang Bombo Radyo kay Elsa Padernilla, iloy ni Ernie, iya ginpahayag nga wala nangin mahapos ang inagyan sang iya anak sa akademya sa diin nagniwang ini.
Suno sa natungdan, nakaagi nga isa ka semana nga wala nakakaon ang iya anak kag dulce lang ang iya ginakunsumo.
Apang sa pihak sini, nalampuswasan sang iya anak ang kabudlay sa akademya.
Ginpakigbahin man sini nga humalin sang elementary pa lang si Ernie, matutum na ini sa pag-eskwela.
Suno naman kay Renato Padernilla, amay ni Ernie, dako ang nabulig sang scholarship sang gobyerno sa iya apat ka mga kabataan.
Ginapabugal sini ang iya mga kabataan nga lunsay mabuot, matutom kag naga-ulikid sa ila.
Wala naman napunggan sang amay nga mangin emosyonal samtang ginadumdum ang kabudlay nga ila naagyan tubtub makatapos sa pagtuon ang iya mga kabataan.
Sa graduation ceremony sa Abril 21, pasidunggan si Padernilla bilang Presidential Kampilan for the Top 1; Chief, PNP Kampilan nga highest order of merit para sa isa ka Police Cadet; Best in Thesis; kag Best in Forensic Science.
