Ginakabig sang mga pulis sa New York nga racist hate crime ang natabo nga mass shooting sa isa ka supermarket sa Buffalo.
10 ang patay sa amo nga mass shooting kag tatlo ang pilason. 11 sa mga ginpangtiro ang gin-identify nga African-Americans.
Ang insidente ang kahimuan sang armado nga 18-anyos nga lalaki nga yara na subong sa kustodiya sang pulis.
Na-identify ang suspek nga halin sa Conklin, New York, kag gina-alegar nagsulat pa sang White supremacist manifesto online, nagbyahe sang 200 miles padulong sa store, kag gin-livestream pa ang amo nga pagpang-atake.
Suno sa imbestigasyon sang pulis, gintiro sang suspek ang apat ka tawo sa parking lot sang supermarket antes ini nagdiretso sa sulod.
Gintiro man ini sang guwardya apang wala nadutlan bangud sang iya nga ginasuksok nga body armor.
Gintiro pa gid sang suspek ang siyam ka tawo sa sulod sang store.
Sang nag-abot ang pulis, gintutok sang suspek ang assault-type rifle sa iya liog kag namahog nga tiruhon ang iya kaugalingon.
Natigayon nga manegosyar sang pulis kag nag-deescalate ang sitwasyon.
Sa latest update, gin-identify nga apat sa mga biktima amo ang store employees, ang nabilin amo ang customers, kag patay man pati ang guwardiya.
Ginkumpirma naman sang Philippine Consulate sa New York nga wala sang Filipino casualties sa natabo nga grocery shooting incident.
Suno kay Consul General Elmer Cato, may yara sang 540 ka Pinoy sa Buffalo kag lunsay safe.
