43 na ka mga kaso sang suicide ang na-rekord sa probinsya sang Iloilo halin sang Enero tubtub Mayo subong nga tuig.
Mas mataas ini nga numero ipaanggid sa mga kaso nga narekord sa amo man nga period sang nagligad nga mga tuig. Kun pahat-pahaton, sang 2021, may yara sang 41 ka kaso, may 37 sang 2020, kag may 40 sang 2019.
Sa interview sang Bombo Radyo kay Police Senior Master Sergeant Francisco Lindero, Jr., spokesperson sang Iloilo Police Provincial Office (IPPO), iya ginpahayag nga sa mga naghikog, pinakamataas ang yara sa edad nga 17-30 anyos nga may 21 ka mga biktima; sunod amo ang edad 45-anyos pasaka, may 11 ka mga biktima; sunod amo ang 31-45 anyos nga may siyam ka mga biktima; kag sunod amo ang 17-anyos panubo nga may duha mga biktima.
Sa 43 ka mga kaso, 37 ang mga lalaki kag anum ang babayi. Sa report sang IPPO, ginapahayag nga depression ang ginalantaw rason sang paghikog nga ginaangot man sa naguba nga mga relasyon.
Sa figures naman sa mga tigulang, kalabanan amo ang mga may balatian nga ginasuprer.
Sa lebel sang PNP, may yara sang ginlunsar ang IPPO nga “Pag-ulikid” Desk initiative sa tanan nga police stations sa probinsya agud nga matapna ang nagasaka nga suicide cases.
Ini nga desks ang ginapangunahan sang Women’s and Children Protection Desk (WCPD). Gina-cater diri ang mga biktima sang anxiety kag depression. ##
