Epektibo na subong nga adlaw sang Martes, Hunyo 14, ang panibag-o nga big-time oil price hike.
Yari ang pagsaka sa presyo sang produktong-petrolyo suno sa advisories sang oil companies:
GASOLINA – magasaka sang P2.15 kada litro
DIESEL – magasaka sang P4.30 kada litro
KEROSENE- magasaka sang P4.85 kada litro
Suno kay Department of Energy-Oil Industry Management Bureau Director Rino Abad, lakip sa mga rason sang price hike amo ang pagpahalog sang lockdowns sa China, ang pag-ban sang European Union sang Russian oil imports, kag ang summertime sa northern hemisphere countries halin subong nga Hunyo tubtub pa sa bulan sang Semptyembre.
Sandig sa latest data nga available nagikan sa Department of Energy, yari ang net increase ukon ang pagsaka sang presyo halin sang una nga semana sang Enero subong nga tuig:
GASOLINA – P26.55 ang saka kada litro
DIESEL – P36.85 kada litro
KEROSENE – P33.10 kada litro
Bangud naga-agunto ang mga driver sang jeep, nagpahayag naman ang Land Transportation Franchising and Regulatory Board (LTFRB) nga natalana sa katapusan sang bulan sang Hunyo ukon sa temprano nga bahin sang Hulyo ang rollout sang second tranche sang P5-billion fuel subsidy program para sa public utility vehicle (PUV) drivers kag operators.
Suno kay LTFRB Executive Director Tina Cassion, ginapreparar lang ang mga dokumento para sa distribution sang P6,500 fuel subsidy para sa kada benepisyaryo nagikan sa PUV sector.
