Kabug-usan nga 7,051 foreign kag Filipino tourists ang nag-abut sa Pilipinas umpisa sang gin-implementar ang no-quarantine policy para sa mga fully vaccinated foreign travelers halin sa visa-free countries sa tunga sang COVID-19 pandemic.
Suno kay Department of Tourism (DOT) Secretary Bernadette Romulo-Puyat, 45 percent sa 7,051 amu ang mga balikbayan.
Ang mga balikbayan ang makabig nga turista bangud sila ang may yara sang foreign passports.
Suno kay Puyat sa tanan nga international travelers, pinakamadamo ang naghalin sa United States, Canada, United Kingdom, Japan, kag Korea.
Madamo sa mga ini ang business travelers, kag ang iban ang nagpauli sa ila mga pamilya.
Nahibaluan nga ginbuksan na ang border sang Pilipinas sang Pebrero 10.
Ang fully vaccinated foreign nationals lang ang ginatugutan nga magsulod sa Pilipinas kag kinahanglan nga mapresentar ang mga gin-require nga dokumento sang Inter-Agency Task Force for the Management of Emerging Infectious Diseases (IATF).
Ginabanta 20,000 ka Returning Overseas Filipinos (ROFs) naman ang nakapauli na sa Pilipinas humalin Pebrero 1 tubtub Pebrero 10.
