JAPAN – Nagapabilin subong sa gihapon nga dako nga palaligban ang istorya sang isa ka monyeka sa Japan nga ginpangalanan kay Okiku sa diin nagalaba ang iya buhok.
Suno kay Bombo International Correspondent Josel Palma, nag-umpisa ang istorya sang tuig 1918 sang ginbakal siya sang bata nga lalaki sa isla sang Hokkaido agud iregalo sa iya mangod.
Tuman ang kalipay sang bata nga babaye sa diin ginhatagan niya ini sang pangalan nga kaangay man sang iya nga pangalan nga Okiku.
Ang bata nga babaye kag ang monyeka ang literal nga indi mabulag.
Sa ulihi, nagmasakit ang bata sa diin gintrangkaso ini bangud sa mga komplikasyon tubtub napatay.
Bilang memorya sang ila pinalangga nga anak nga babaye, ginbutang sang iya mga ginikanan ang monyeka sa altar sang pamilya.
Wala nagdugay, namutikan nila nga amat-amat nga nagalaba ang buhok sang monyeka kaangay sang isa ka buhi nga babaye.
Gin-umpisahan nila nga guntingan ang buhok sang monyeka kag sa tion nga maglaba ang buhok, naga-untat ini sa iya tuhod nga amo ang eksakto nga kalabaon sang buhok sang napatay nga si Okiku.
Sang 1938, nagsaylo ang pamilya sa Sakhalin, apang nahadlok sila nga updon ang monyeka.
Sa baylo, gindala nila ini sa Mannenji Temple sa Iwamizawa, Hokkaido, sa diin ginsulod ini sa espesyal nga kahon nga himo sa kahoy.
Sa subong, ang monyeka ang yara sa gihapon sa templo kag regular nga ginaguntingan ang iya buhok.
