Ginkilala ang 71-anyos nga Ilongga Barangay Health Worker (BHW) bilang isa sa Top 10 National Awardees sang 36th Sampung Ulirang Nakatatanda (SUN) Awards.
Ini amo si Violeta “Bulit” Gicana sang Barangay Bagumbayan, Guimbal, Iloilo.
Sa interview sang Bombo Radyo kay Gicana, iya ginpahayag nga 43 na ka tuig ang iya pagdedikar sa iya kaugalingon sa pagserbisyo sa komunidad.
Bilang isa ka iloy, nahangpan sini kun daw ano ka-importante nga may ihibalo sa dapat himuon pananglitan nga magmasakit ang kabataan ilabi na sa dis-oras sang kagab-ihon ukon kun nahamtang ang balay sa malayo nga mga lugar.
Nagsugod siya sa pagserbisyo nga isahanon lang nga BHW sa ila lugar kag 20 pesos lang ang honorarium.
Apisar sini, wala siya nag-untat kag ginkabuhi gid ang commitment sa iya trabaho.
Halin sang 2017 tubtub subong, siya ang nagapungko nga Presidente sang BHW Association sa probinsya sang Iloilo, nga nangin paagi man agud nga mapakigbahin sini ang iya eksperyensya sa iban.
“Bilang Barangay Health Workers, i-love gid naton, hakson gid naton ang aton obligasyon kay kita ang frontliners or ang una nga soldado sa aton barangay in terms sa ikaayong lawas,” suno kay Gicana sa interview sa Good Morning Philippines.
“Ako, gapati gid ako nga kun mayad ang lawas naton, wara ti problema nga indi naton masolbar. Buruligan naton nga ang programa sang Department of Health, mapalab-ot naton sa pumuluyo nga sa diin ma-save naton ang mga panimalay,” dugang niya.
Ang Sampung Ulirang Nakatatanda (SUN) Awards nga nagpasidungog sa iya amo ang tuigan nga search para sa 10 ka outstanding and inspiring Filipino senior citizens nga may yara sang selfless service kag liderato sa ila komunidad.
Ini ang ginapangunahan sang Coalition of Services of the Elderly, Incorporated nga kabahin sang selebrasyon sang Elderly Filipino Week subong nga Oktubre.#
